Иштироки вакили Маҷлиси намояндагон дар Форуми байналмилалии парламентӣ
Чоруми августи соли равон вакили Маҷлиси намояндагони Маҷлиси Олии Ҷумҳурии Тоҷикистон Ғайрат Азиззода дар Форуми байналмилалии парламентӣ, ки дар Туркманистон доир гардид, иштирок намуд.
Таъкид гардид, ки чорабинии мазкур имкон фароҳам меорад, дар баробари проблемаҳои дигар масъалаҳои умумии кишварҳо, ки роҳи баромад ба баҳрро надоранд, баррасӣ гардад.
- Ҷумҳурии Тоҷикистон, ки роҳи баромад ба баҳрро надорад, ба дастрасии устувор ба бозорҳои байналмилалӣ, рушди инфрасохтори транзитӣ, шакливазкунии рақамӣ ва таҳкими ҳамкориҳои минтақавӣ таваҷҷуҳи хоса дорад. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон тайи чанд соли охир мушкилоти кишварҳоеро, ки роҳи баромад ба баҳрро надоранд, дар арсаи ҷаҳонӣ матраҳ намуда истодаанд. Даҳсолаи байналмилалии амал «Об - барои рушди устувор, солҳои 2018-2028» бо пешниҳоди Тоҷикистон аз ҷониби Маҷмаи умумии СММ қабул ва ба идоракунии устувору самараноки захираҳои об дар соҳаҳои энергетика, кишоварзӣ, саноат ва ғайра нигаронида шудааст,- иброз дошт вакили Маҷлиси намояндагон дар форум.
Ғайрат Азиззода афзуд, ки илова бар ин, Тоҷикистон дар ташаккули долонҳои нави нақлиётӣ ва энергетикӣ дар минтақа, аз ҷумла татбиқи лоиҳаи CASA-1000, фаъолона иштирок менамояд. Ин тадбирҳо метавонанд иқтидори содиротӣ ва логистикии кишварҳои ба баҳр роҳи баромад надоштаро ба таври назаррас васеъ намоянд.
Файзулло НАҶМИДДИНИЁН,
мудири шуъбаи матбуоти Дастгоҳи МНМО ҶТ
Ҳамчунин дигар маводҳо:
