Суҳбати Файзалӣ Идизода бо Сафири Фаластин
22-юми августи соли 2025 Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо сафири Давлати Фаластин Адҳам Муҳаммад Алӣ Ҳасан Зайналадин мулоқот намуд.
Зимни мулоқот иброз гардид, ки ҳамкориҳои Тоҷикистон ва Фаластин давоми 33 сол, бахусус солҳои охир, вусъати тоза ёфта, санадҳои дуҷонибаи ҳамкорӣ, аз ҷумла Созишнома оид ба таъсиси Шурои соҳибкорони Тоҷикистону Фаластин, имзо шуданд, ки метавонанд барои густариши муносибатҳои тиҷоратӣ мусоидат намоянд.
- Маҷлиси намояндагон парламенти доимоамалкунандаи касбӣ аст, ки дар қабули қонунҳо, тасвиби шартномаҳои байналмилалӣ таҷрибаи ғанӣ дорад. Аз ин рӯ, ба назари мо, - гуфт Ф. Идизода, - табодули таҷрибаи вакилони ҳарду кишвар ба нафъи тарафҳо буда, барои пешрафти фаъолияти қонунгузорӣ метавонад мусоидат намояд.
Фаъолияти гурӯҳи дӯстӣ ва ҳамкории Маҷлиси намояндагон бо Шурои қонунгузории Давлати Фаластин барои ҳамоҳанг намудани робитаҳои дӯстӣ байни мардумони ду кишвар муҳим арзёбӣ гардид.
Барои густариши ҳамкориҳо бо Шурои қонунгузории Давлати Фаластин ба роҳ мондани муколама, мубодилаи сафарҳои расмии ҳайати гурӯҳҳои дӯстӣ ва таҳкими ҳамкориҳои байнипарламентӣ муҳим дониста шуд.
Файзулло НАҶМИДДИНИЁН,
мудири шуъбаи матбуоти Дастгоҳи МНМОҶТ
Ҳамчунин дигар маводҳо:
