Эй шаҳри дӯстдорам,

Эй шаҳри дӯстдорам,

Эй шаъну ифтихорам.

Тоби ҷудоӣ аз ту

Як лаҳзае надорам.

Ҷову макон, Душанбе,

Монӣ амон, Душанбе.

Рӯидаем аз ту,

Сабзидаем аз ту.

Сад гуна меҳрубонӣ

Хуш дидаем аз ту.

Чун боғбон, Душанбе,

Монӣ амон, Душанбе.

Шаҳре чу боғу бӯстон,

Эй рашки сад гулистон.

Васфи туро ба дафтар

Ҳаргиз наяст поён.

Сад достон, Душанбе,

Монӣ амон, Душанбе.

Гаштем рӯи дунё,

Дидем пасту боло.

Танҳо туӣ ба дида

Ҳамчун биҳишт зебо.

Зеби ҷаҳон, Душанбе,

Монӣ амон, Душанбе.

Эй пойтахти озод,

Эй шаҳри бахтобод.

Бо ҳусни бемисолат,

Монӣ ҳамеша дар ёд.

Шаҳри ҷавон, Душанбе,

Монӣ амон, Душанбе.

Равшан бувад чароғат,

Дигар надида доғат.

Дар чор фасл монад,

Сарсабз боғу роғат!

Моро чу ҷон, Душанбе,

Монӣ амон, Душанбе.

Гурез САФАР