Омӯзгор бунёдгузори ояндаи босаодати миллат аст

Дар хазинаи маънавии ҳар як миллат номи омӯзгор бо ҳарфҳои заррин ҳаккокӣ шудааст. Агар оила нахустин мактаби ҳаёт ва пойдевори бинои шахсияти инсон бошад, омӯзгор меъмори руҳи инсон аст. Нақши устод дар тарбияи насли наврас на танҳо бо омӯзонидани илму дониш, балки парвариши ахлоқи ҳамида, ташаккули ҳувияти миллӣ ва омода сох­тани шаҳрванди комил ба ҷомеа бениҳоят бузург аст.

Вазифаи аввалини омӯзгор кушодани дари илму маърифат ба рӯи шогирдон аст. Омӯзгори ҳақиқӣ танҳо нақлкунандаи формулаву қоидаҳои хушк нест, ӯ чароғи ҳидоятест, ки дар қалби шогирд шуълаи муҳаббат ба донишандӯзиро фурӯзон мекунад. Устоди асил ба шогирд на танҳо «чиро донистан», балки «чӣ гуна донистан»-ро меомӯзонад. Тафаккури интиқодӣ, қобилияти таҳлил ва малакаи мустақилона фикр карданро дар насли наврас парвариш медиҳад, ки ин беҳтарин тӯша барои сафари пур аз мушкилоти зиндагист.

Тарбияи ахлоқӣ ва маънавии насли ҷавон яке аз вазифаҳои муқаддаси омӯзгор ба шумор меравад. Арзишҳое чун ростқавлӣ, адолат, эҳтиром ба калонсолон, раҳмдилӣ, масъулиятшиносӣ ва некӯкорӣ на танҳо бо сухан, балки бештар бо амалу рафтори худи муаллим дар зеҳни шогирд нақш мебанданд. Омӯзгор барои шогирдонаш намунаи олии ибрат аст. Нигоҳ, сухан, муносибати ӯ бо атрофиён ва ҳатто тарзи либоспӯшӣ дар маҷмуъ, дарси бузурги тарбия мебошанд. 

Омӯзгори зираку ботаҷриба ба мисли боғбони моҳир аст, ки медонад кадом ниҳол ба чӣ гуна парвариш ниёз дорад. Ӯ истеъдоди шогирдро дар соҳаи илм, санъат, варзиш ё дигар ҳунарҳо сари вақт пай бурда, барои рушди он мусоидат мекунад ва ӯро руҳбаланд месозад. Маслиҳати устод дар интихоби касби ояндаи шогирд нақши ҳалкунанда дорад. Маҳз омӯзгор метавонад ӯро ба роҳе ҳидоят намояд, ки дар оянда ҳамчун мутахассиси варзида ва шахси муваффақ ба нафъи худ ва ҷомеа хизмат кунад.

Омӯзгорӣ на танҳо як касб, балки рисолати бузургу муқаддас аст. Ояндаи ҳар як миллат аз он вобаста аст, ки насли ҷавони он имрӯз дар мактаб чӣ гуна таълиму тарбия мегирад. Аз ин рӯ, эҳтиром ва қадршиносӣ аз заҳмати омӯзгор, фароҳам овардани шароити арзанда барои фаъолияти ӯ ва баланд бардоштани мақоми устод дар ҷомеа қарзи ҳар як фарди бедордил ва вазифаи муҳими давлату ҷомеа аст, ки дар ин замина метавонем фардои дурахшони Ватани азизамонро таъмин намоем.

Фирӯза АБДУМАНОНОВА,

омӯзгори Донишгоҳи давлатии ҳуқуқ, бизнес ва сиёсати Тоҷикистон