Масъулиятшинос
Ҳар боре сухан дар бораи Ҷаббор Ҷалолович Аҳмадов меравад, ҳозирин мегӯянд, ки одами қавлу амал, шахсияти принсипнок, роҳбари боҷуръат, сиёсатмадору қонунгузорӣ муваффақ, дар муносибат бо зердастон сахтгиру серталаб аст.
Аз шунидани чунин суханҳо сарнавишту фаъолияти қариб панҷоҳсолаи номбурда пеши назарам меояд. Ба фаъолияти меҳнатиаш аз наздик ошно ҳастам ва бо масъулияти том гуфта метавонам, ки дар ҳақиқат, Ҷаббор Ҷалолович Аҳмадов дорои маънавиёту ҷаҳонбинии васеъ, олими тавоно ва дӯсту бародари ҷонӣ мебошад. Понздаҳ соли фаъолияти вай ба замони Тоҷикистони шуравӣ ва 34 сол ба даврони соҳибистиқлолии Тоҷикистон рост меояд. Муддати 34 сол муовини раиси шаҳри Хуҷанд, муовини раиси вилояти Суғд, ду навбат вакили Маҷлиси намояндагони Маҷлиси Олии Ҷумҳурии Тоҷикистон буд.
Ҷаббор Ҷалолович баъд аз хатми мактаби миёна ба мактаби олӣ нарафт, меҳру муҳаббати истеҳсолот ӯро ба корхонаи шоҳибофии шаҳри Хуҷанд бурд. Ҳамкорон маслиҳат доданд, ки ба мактаби олии техникӣ равад, чунки онҳо дар симояш бунёдкору созанда, ояндабини реалӣ ва сиёсатмадори асилро медиданд.
Ба Институти педагогии шаҳри Хуҷанд дохил шуд. Баъд аз хатми институт истеъдоди баланди ташкилотчигӣ ва ҷаҳонбинии васеи сиёсиву ҷамъиятии Аҳмадовро ба эътибор гирифта, ӯро ба кори комсомолӣ ҷалб карданд. Дар комитети комсомолии вилояти Ленинобод (ҳоло Суғд) инспектор, ташкилотчии масъул ва мудири шуъба буд. Дар он ҷо бо кормандони ботаҷрибаю кордон ошноӣ пайдо карда, дар муддати кӯтоҳ сазовори ҳурмату эҳтироми ҷавонони вилоят гардид ва барои хизмати арзанда бо Фармони Президиуми Совети Олии ИҶШС бо медали «Барои меҳнати шоён» сарфароз гардид.
Маҳз ташаббус, муносибати эҷодӣ, принсипнокӣ, хоксорӣ, ташкилотчигӣ, кордонӣ ва масъулияти баланд Ҷаббор Аҳмадовро ба комитети вилоятии Ҳизби коммунисти Тоҷикистон овард. Дар ин ҷо аз мактаби ходимони намоёни давлатию сиёсӣ баҳраманд шуд. Ҷаббор Аҳмадов дар шуъбаи ташкилӣ ва кор бо кадрҳои комитети вилоятии партия кӯшиш кард, ки мутахассисон ва ҷавонони қобилиятнок ба корҳои роҳбарӣ ҷалб карда шаванд. Бо тавсияи ӯ ҷавонони ояндабин аз шаҳру ноҳияҳои вилоят барои таҳсил ба Мактаби олии партиявии шаҳри Тошканд ва дигар шаҳрҳои ИҶШС фиристода шуда, даҳҳо мутахассисони ҷавон ба рӯйхати захираи кадрҳои роҳбарикунанда дохил гардиданд.
Ҷаббор Аҳмадов ҳамеша бо мардум аст - дар рӯзҳои хурсандӣ ва ҳам дар лаҳзаҳои ғаму андуҳ. Хислати инсондӯстӣ, кордонӣ ва қобилияти баланди ташкилотчигии Ҷаббор Аҳмадовро сокинони ноҳияи Бобоҷон Ғафуров ва шаҳри Чкалов қадр карда, ӯро дар даъватҳои сеюму панҷум вакили Маҷлиси намояндагони Маҷлиси Олии Ҷумҳурии Тоҷикистон интихоб карданд.
Дар як суҳбат собиқ Раиси Маҷлиси намояндагони Маҷлиси Олии Ҷумҳурии Тоҷикистон Сайдулло Хайруллоев аз шунидани маротибаи дуюм ба сифати номзад ба вакили Маҷлиси намояндагон аз ҳавзаи интихоботии Ӯрунхоҷаев ба қайд гирифта шудани Ҷаббор Аҳмадов изҳори хушҳолӣ намуда, иброз дошт, ки «Ҷаббор Аҳмадов дар Кумита оид ба қонунгузорӣ ва ҳуқуқи инсон панҷ сол бомуваффақият фаъолият кард. Ӯ яке аз вакилони хуби қонундону қонунгузор, шахси бомаърифату маданист, ки дар инкишофу такмилёбии қонунгузории миллӣ саҳми бориз дорад. Ин дафъа ҳам вакил интихоб гардид, ки дар инкишофу пешрафти иқтисодиёту иҷтимоиёти ноҳия ва дар ободонии маҳал саҳм мегузорад. Интихобкунандагони ин ҳавза ифтихор кунанд, ки чунин намоянда дар мақоми олии қонунгузори мамлакат доранд».
Аввалин иқдоми Ҷаббор Аҳмадов бо истифода аз ҳуқуқи ташаббуси қонунгузорӣ таҳияи лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Қонуни Ҷумҳурии Тоҷикистон «Дар бораи муроҷиати шаҳрвандон» буд, ки он аз ҷониби вакилони Маҷлиси намояндагон хуш пазируфта шуд. Дар фаъолияти қонунэҷодкунӣ Ҷаббор Аҳмадов намунаи ибрати вакилон гардид.
Дар давраи вакилӣ барояш муяссар шуд, ки лоиҳаҳои даҳ қонунро таҳия намояд. Дар парламенти кишвар бо шахсиятҳои шинохтаи ҷумҳурӣ, сиёсатмадорони варзида хамкорӣ карда, аз таҷрибаи кории онҳо баҳраманд шуд ва бо онҳо робитаи қавии дӯстӣ дошт.
Барои хизматҳои арзанда дар назди халқу Ватан Ҷаббор Аҳмадов бо мукофоти давлатӣ – Корманди шоистаи Тоҷикистон сарфароз гардидааст. Ҳамзамон, Ҷаббор Аҳмадов барои ҳамкории босамар, иштирок дар такмилёбии қонунгузории байналмилалӣ бо медали Ассамблеяи байнипарламентии давлатҳои аъзои Иттиҳоди Давлатҳои Мустақил қадр шудааст.
Нодирҷон СОЛИҶОНОВ,
дотсенти Донишгоҳи давлатии Хуҷанд ба номи академик Бобоҷон Ғафуров,
вакили Маҷлиси намояндагони Маҷлиси Олии Ҷумҳурии Тоҷикистон даъвати сеюм
Ҳамчунин дигар маводҳо:
