Мулоқоти Файзалӣ Идизода бо Аймурод Қочмуродов
20-уми августи соли 2025 Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо сафири фавқулода ва мухтори Туркманистон дар Ҷумҳурии Тоҷикистон Аймурод Қочмуродов мулоқот намуд.
Зимни мулоқот зикр гардид, ки Туркманистон аз соли 1993 бо Ҷумҳурии Тоҷикистон робитаҳои дипломатӣ барқарор намуда, заминаи ҳуқуқии ҳамкориҳои кишварҳоямонро ҳудуди 140 санад дар бар мегирад.
- Ҳамкориҳои гуногунҷанбаи Тоҷикистону Туркманистон солҳои охир бо ташаббусҳои созандаи роҳбарияти олии кишварҳоямон - Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Раиси Халқ маслиҳатии Туркманистон Гурбонгулӣ Бердимуҳамедов ва Президенти Туркманистон Сердар Бердимуҳамедов батадриҷ вусъат меёбанд, - иброз дошт Файзалӣ Идизода.
Таъкид шуд, ки ҳамкориҳои байнипарламентӣ бо Туркманистон имкон медиҳад оид ба масъалаҳои мубрами минтақавию байналмилалӣ мавқеъ ва назари муайян дошта бошем, ташаббусҳои созандаи ҳамдигарро дар арсаи байналмилалӣ ҷонибдорӣ намоем.
- Маҷлиси намояндагон бо парлумони Туркманистон гурӯҳи дӯстӣ ва ҳамкорӣ таъсис дода, барои рушди муносибатҳо дар платформаи механизмҳои ҳамкорӣ, бахусус хамкориҳои байнипарламентӣ дар чаҳорчӯби фаъолияти Иттиҳоди байнипарламентӣ ва гурӯҳи дӯстӣ, ҷаҳду талоши созанда хоҳад намуд, - афзуд Ф. Идизода.
Файзулло НАҶМИДДИНИЁН,
мудири шуъбаи матбуоти Дастгоҳи МНМОҶТ
Ҳамчунин дигар маводҳо:
