Вохӯрии Шермуҳаммад Шоҳиён бо у Сяот Зюн

26-уми августи соли 2025 муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён бо ҳайати Ҷумҳурии Мардумии Чин таҳти роҳбарии узви Кумитаи марказии Ҳизби коммунисти Чин, Котиби Кумитаи марказии Ҳизби коммунисти Чин дар вилояти Синхай ҷаноби У Сяот Зюн мулоқот намуд.

- Муносибатҳои Тоҷикистону Чин решаҳои таърихӣ дошта, дар сиёсати хориҷии Тоҷикистон мавқеи муҳимро ишғол менамояд ва мо хоҳони рушду таҳкими минбаъдаи ҳамкориҳо бо ин кишвари дӯсту бародар мебошем, - гуфт Шермуҳаммад Шоҳиён.

Зикр шуд, ки Ҷумҳурии Тоҷикистон бо Ҷумҳурии Мардумии Чин шарикони стратегӣ буда, дар тақвияти муносибатҳои дуҷониба ва бисёрҷонибаи ин кишварҳои ҳамсоя нақши Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам ­Эмомалӣ Раҳмон ва Раиси Ҷумҳурии Мардумии Чин муҳтарам Сӣ Ҷинпин калидӣ аст. 

Имрӯз ҳамкориҳои дуҷонибаи Ҷумҳурии Тоҷикистон ва Ҷумҳурии Мардумии Чинро беш аз 200 шартномаю созишнома ҳамчун заминаи ҳуқуқӣ таҳким мебахшад. 

Таъкид гардид, ки муносибатҳои байнипарлумонии кишварҳоямон, ки пайваста рушду густариш ёфта истодаанд, ба таҳкими муносибатҳо дар дигар самтҳо, аз ҷумла маорифу тандурустӣ, кишоварзӣ, иқтисодиёту иҷтимоиёт, роҳу нақлиёт ва ғайра, мусоидат хоҳанд намуд.

Файзулло НАҶМИДДИНИЁН,

мудири шуъбаи матбуоти Дастгоҳи МНМОҶТ.

Суратгир Неъматулло АЛИЕВ