Ректори Донишгоҳи давлатии тиббии Тоҷикистон ба номи Абӯалӣ ибни Сино Гулзода Маҳмадшоҳ Қурбоналӣ аз вазъи имрӯзаи кору таҳсил ва натиҷаҳои бадастовардаи устодону донишҷӯён ҳарф зада, аз ҷумла изҳор дошт, ки сафи донишҷӯён солҳои охир афзуда, ҳоло ба 9571 нафар расидааст, ки назар ба соли гузашта 153 нафар зиёд мебошад. Дар донишгоҳ фазои таълимӣ бо забони русӣ нигоҳ дошта, миқдори гурӯҳҳои бо ин забон таҳсилкунанда 60,5 фоизи шумораи умумии гурӯҳҳоро ташкил медиҳад.
Вазорати маориф ва илми Ҷумҳурии Тоҷикистон рейтинги донишгоҳу донишкадаҳои мамлакатро муайян намуд ва Донишгоҳи давлатии тиббии Тоҷикистон ба номи Абӯалӣ ибни Сино бо доштани заминаи хуби моддию техникӣ, ҳайати мукаммали профессорон ва дигар устодони баландпоя дар зинаи дуюми рейтингии донишгоҳу донишкадаҳои кишвар қарор гирифт.
- Яке аз ҳадафҳои асосии фаъолияти бахши таълимии донишгоҳ баланд бардоштани сифати таълим аст, — таъкид намуд ректор ва иброз дошт, ки 39,8 фоизи донишҷӯён имтиҳонҳоро бо баҳоҳои «аъло» ва «хубу аъло» супориданд, ки назар ба сессияи гузашта қариб панҷ фоиз зиёд аст. Ин аз беҳтар гардидани ҷараёни таълим дар донишгоҳ ва фаъолияти кафедраҳо гувоҳӣ медиҳад. Аз 1206 нафар хонандаи имсола 72 нафар соҳиби дипломи аъло шуданд.
Устодони донишгоҳ ба кумаки ташхисию табобатӣ низ машғуланд ва дар нимсолаи аввал онҳо ба 27165 бемор кумаки табобатию машваратӣ ва ташхисӣ расониданд. Кафедраҳои тахассусии ҷарроҳӣ 6084 амали ҷарроҳӣ анҷом доданд.
Соли ҷорӣ ба донишгоҳ 400 нафар зиёд донишҷӯй қабул карда мешавад. Бинобар ин, ҳоло бо кумаки Ҳукумати Ҷумҳурии Тоҷикистон сохтмони Маҷмааи нави таълимии донишгоҳ дар Қарияи Боло босуръат идома дорад ва то оғози соли нави таҳсил мавриди истифода қарор хоҳад гирифт.
Абдумаҷид МУРОДОВ, «Садои мардум»
