Бисту нуҳуми апрели соли 2015 таҳти раёсати Президенти Ҷумҳурии Тоҷикистон, Раиси Ҳукумати кишвар Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор шуд.
Дар оғози маҷлис масъалаи кадрҳо баррасӣ шуда, зимни он чунин таъинот амалӣ гардид:
- Шералӣ Сиддиқов — директори иҷроияи Бунёди миллии иҷтимоии маблағгузории Тоҷикистон;
- Маҳмадулло Шералиев — директори иҷроияи Гурӯҳи татбиқи лоиҳаи таҷдид ва идомаи сохтмони муассисаҳои таҳсилоти миёнаи умумӣ;
- Алимардон Азимов — директори Муассисаи давлатии маркази татбиқи лоиҳаи бақайдгирӣ ва системаи кадастри замин барои тараққиёти устувори соҳаи кишоварзӣ;
- Ҷамшед Лақаев — директори Маркази идораи лоиҳаи рушди инфраструктураи маҳаллӣ (коммуналӣ) дар Ҷумҳурии Тоҷикистон;
- Нусратулло Мусоев — муовини вазири кишоварзии Ҷумҳурии Тоҷикистон;
- Шералӣ Вазиров — сардори Хадамоти назорати давлатии байтории Вазорати кишоварзии Ҷумҳурии Тоҷикистон;
- Ниматулло Таваров — сардори Хадамоти давлатии фитосанитарӣ, карантини растаниҳо ва назорати тухмии Вазорати кишоварзии Ҷумҳурии Тоҷикистон;
- Исуф Шоев — директори Корхонаи воҳиди давлатии ҷумҳуриявии «Тоҷикагролизинг».
Сипас, ҳисоботи раиси ноҳияи Темурмалики вилояти Хатлон оид ба рафти иҷрои Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» ва Қонуни Ҷумҳурии Тоҷикистон «Дар бораи мақомоти худидоракунии шаҳрак ва деҳот» шунида шуд.
Чунонки зикр гардид, ҳоло дар ин ноҳия 63 ҳазор аҳолӣ сукунат дорад ва ба туфайли рушди иҷтимоию иқтисодии ҷумҳурӣ ва минтақа сатҳи зиндагии мардум пайваста боло меравад. Тавассути сохтмон ва ба кор даровардани корхонаҳои нави истеҳсолӣ ҳоло ноҳия аз минтақаи аграрӣ ба аграрию саноатӣ табдил меёбад.
Сарвари давлат Эмомалӣ Раҳмон аз мушкилоти асосии мардуми ноҳия, чун норасоии оби ошомиданӣ ва шабакаи обу корез, мустаҳкамкунии соҳилҳо ва ҳам аз имконоти фарох барои рушди бахшҳои чорводорӣ, ғаллакорӣ, боғу токпарварӣ ва туризм ёдовар шуда, дар назди роҳбарияти ноҳия ва масъулини ҷумҳуриявӣ вазифаҳои мушаххас гузошт.
Дар бораи сари вақт омода кардани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2015-2016 вазири рушди иқтисод ва савдо Неъматулло Ҳикматуллозода гузориш дод.
Сарвари давлат Эмомалӣ Раҳмон таъкид дошт, ки ба зимистони оянда ҳамаи сохторҳои давлатию ҷамъиятӣ аз ҳозир бояд омодагӣ гиранд.
Ба баррасии Маҷлиси намояндагони Маҷлиси Олии Ҷумҳурии Тоҷикистон лоиҳаи тағйиру иловаҳо ба якчанд қонун, аз ҷумла ба қонунҳои Ҷумҳурии Тоҷикистон «Дар бораи силоҳ», «Дар бораи савдо ва хизматрасонии маишӣ» ва «Дар бораи фаъолияти савдои хориҷӣ» фиристода шуд.
Нақшаи генералии маркази ноҳияи Темурмалики вилояти Хатлон тасдиқ гардид.
Дар фароварди маҷлис доир ба тезонидани навсозии роҳҳои мошингарди шаҳрҳои Кӯлобу Қӯрғонтеппа ва истиқбол аз 70-солагии Ғалаба бар фашизм ба масъулин супоришҳои мушаххас дода шуд.
www.president.tj
