Чунин аст мақсади масъулини ноҳияи Рашт

- Дар асоси ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби Мақомоти иҷроияи маҳаллии ҳокимияти давлатии ноҳияи Рашт оид ба рушди соҳаи агросаноатӣ тадбирҳои судманд андешида мешаванд. Ҳалли ин масъала на танҳо ба таъмини амнияти озуқаворӣ, балки фаро гирифтани шаҳрвандон ба касбу кор, рушди бемайлони соҳаи кишоварзӣ ва тақвияти вазъи иқтисодии мардум мусоидат мекунад, - гуфт дар суҳбат муовини раиси ноҳия Саидбег Идибегзода. 

Бо мақсади вусъат додани соҳа ва дастгирии кишоварзони ноҳия имсол ба масъалаи обёрии замин ва ба гардиши кишоварзӣ ворид кардани заминҳои бекорхобида таваҷҷуҳи махсус зоҳир шуд. Аз ҷумла, наҳри Сари Шухон, ки бо сабаби фаромадани ярч аз кор баромада буд, аз ҷониби Агентии беҳдошти замин ва обёрии назди Ҳукумати Ҷумҳурии Тоҷикистон ва мақомоти иҷроияи маҳаллии ҳокимияти давлатии ноҳия ба дарозои 2500 метр таъмир шуд. Аз ҳисоби ҳавзаи Фарғона бунёди 4 пойгоҳи обкашӣ ба нақша гирифта шуда, имрӯз 3 адади он мавриди баҳрабардорӣ қарор дорад. Аз ҳисоби мақомоти ноҳия наҳри «50-солагии Тоҷикистон» низ ба дарозии 2000 метр таъмир гардид. Ҳамчунин, дар ҷамоати деҳоти Қалъаи Сурх канали Қамбариён барои шодоб гардондани 300 гектар замин бунёд ёфта, таъмири канали Камчароғ оғоз шуд, ки дар сурати ба истифода додани он боз беш аз 100 гектар замин бо оби полезӣ таъмин хоҳад шуд. Қобили зикр аст, ки дар ноҳия ба воситаи каналҳо 1118 ва ба воситаи пойгоҳҳои обкашӣ 450 гектар замин обёрӣ карда мешаванд.

- Кишоварзони ноҳия дар заминаи чунин дастгириҳо саъю талош доранд, ки соҳаи мазкурро суръат бахшида, дар таъмини амнияти озуқавории мамлакат саҳми назаррас гузоранд. Барои ноил шудан ба ин ҳадаф тирамоҳи соли сипаришуда дар 870 гектар кишти тирамоҳии ғалла ва баҳори соли равон дар майдони 834 гектар кишти баҳории ғалладона гузарониданд. Ҳама шаклҳои хоҷагидорӣ дар 2297 гектар кишти ғалладона, 445 гектар зироати техникӣ ва 3508 гектар кишти картошка гузарониданд, - афзуд С. Идибегзода..

Соҳаи боғдорӣ низ дар ноҳия рӯ ба рушд аст. Имсол дар 10 гектар боғи нав бунёд гардида, 61 гектар боғи куҳна барқарор шуд. Майдони боғҳои мевадиҳанда дар ноҳия ҳоло 4773 гектарро ташкил медиҳад.

Дар баробари соҳаи рустанипарварӣ кишоварзони ноҳия ба чорводорӣ низ машғуланд. Ҳоло дар ноҳия 111031 сар чорвои калони шохдор, 348075 сар моли майда, 129674 сар паранда ва 23328 оилаи занбӯри асал парвариш меёбанд.

Корхонаи давлатии фаръии «Бақайдгирии молу мулки ғайриманқул» дар шаш моҳи соли ҷорӣ ба шаҳрвандон 472 шаҳодатномаи ҳуқуқи истифодаи замин, аз ҷумла 273 шаҳодатномаи ҳуқуқи истифодаи замини наздиҳавлигӣ, 25 шаҳодатнома дар бораи ташкили хоҷагиҳои деҳқонӣ, 44 шаҳодатнома барои сохтмони иншоот ва 129 шаҳодатнома дар бораи вобаст намудани қитъаи замин, додааст.

- Вақти он расидааст, ки дар ҳамаи хоҷагиҳои деҳқонии деҳот, ки шароити парвариши чорворо доранд, фермаҳои хурди чорводорӣ ташкил шавад. Ҳоло дар ноҳия ягон нуқтаи коркарди маҳсулоти ширию гӯштӣ мавҷуд нест. Аҳолии ноҳия, ки истеҳсолкунандаи асосии он маҳсуб мешаванд, дар шароити хона ширро коркард карда, бо нархи ночиз пешкаши харидорон менамоянд, - мегӯяд муовини раиси ноҳия.

Дар баробари чунин дастгириҳо ва бартараф кардани камбудиҳо рушди агросаноатӣ метавонад соҳаи кишоварзиро такон диҳад. Таъсиси корхонаҳои коркарди меваю сабзавот ва маҳсулоти чорво имконият медиҳад, ки Рашт аз минтақаи аграрӣ ба агросаноатӣ мубаддал гардад. Ба ин васила ҳам маҳсулоти кишоварзон харидор меёбаду ҳам қисми зиёди аҳолии қобили меҳнат дар ин корхонаҳо бо ҷойи кори доимӣ таъмин мегарданд.

Диловари МИРЗО,

«Садои мардум»