Помидор малҳам барои саратон

Помидор на танҳо ба ҷисму ҷон муфид аст, балки ба руҳия низ таъсири хуб дорад. Дар таркиби помидор моддаи табиии тирамин мавҷуд аст, ки дар организм ба серотонин мубаддал мешавад. Маҳз ба шарофати серотонин руҳия болида мегардад ва ёрӣ мерасонад, ки ҷисм ба стресс мубориза барад.

Бино ба гуфти доктори илмҳои тиб, профессор Ҷаҳон Азонов, дар таркиби помидор миқдори зиёди сафеда, ферментҳо, сахароза, фруктоза, рафиноза, вербас­коза, калий, калсий, фосфор, оҳан, каротиноид, витаминҳои С, В1, В2, В3, Р, К мавҷуданд. 

Витамини С-и таркиби помидор ба миқдори витамини С-и таркиби лимӯ ва афлесун баробар аст. Дар таркиби помидор кислотаҳои органикӣ (ҷавҳари лимӯ, оксикарбонати дуасоса ва ғайра), антсианҳо ва стеринҳо низ мавҷуданд. Дар тиб меваи онро чун рустании ғизоӣ ва шифоӣ васеъ ба кор мебаранд. Қиёми онро ба бемороне, ки мубодилаи моддаҳои бунияи онҳо вайрон шудааст, аз ҷумла фарбеҳӣ, камхунӣ ва диабети қанд, тавсия медиҳанд. Ғайр аз ин, шираи помидор хусусияти зиддиихтилоҷӣ дорад. 

Пектинҳои помидор холестерини таркиби хунро паст мекунад. Аз ин сабаб истеъмоли он ба одамоне, ки бемории судабандии рагҳои хун (атеросклероз) доранд, муфид аст. Инчунин, помидорро барои ба танзим даровардани мубодилаи моддаҳо, бемории буғумҳо, гурда, фарбеҳӣ ва дилу рагҳои хунгард тавсия медиҳанд.

Мубталоёни бемориҳои илтиҳобию ихтилоҷии системаи ҳозима помидорро бояд пӯст карда истеъмол намоянд, чунки пӯсти помидор ҳангоми илтиҳоби рӯдаҳои борику ғафс (энтероколит), талхадон, ихтилоҷ ва дардҳои рефлекторӣ ба амал меорад. 

 Шираи помидор хосияти барқароркунӣ дошта, кори узвҳои ҳозимаро ба танзим медарорад, ки барои занҳои ҳомила ва кӯдакони ширмак ниҳоят муфид аст. Шираи помидорро асосан 20-30 дақиқа то хӯрок хӯрдан бояд истеъмол намуд. Ҳамроҳ намудани намак ба шираи помидор моҳияти ғизоии онро кам мекунад. Аз ин лиҳоз, шираи помидорро бе намак нӯшидан лозим аст.

Олимони Донишгоҳи Гарварди ИМА муайян намудаанд, ки истеъмоли доимии помидор хавфи мубтало шудан ба бемории саратонро 40 фоиз кам мекунад. Помидор аз ҳама бештар хавфи саратони шуш, меъда, ғадуди ҷинсӣ (простатит) ва ғадуди синаро кам мекунад. Олимон ин таъсири мусбати помидорро ба маводи фаъоли таркиби он - ликопине, ки хусусияти фаъоли зиддиоксидӣ дорад, алоқаманд медонанд. Муайян шудааст, ки маводи ликопин, ки асосан дар таркиби помидор дида мешавад, афзоиши атеросклероз ва хунрезии майнаро кам мекунад.

Фархунда АБДУЛҲАКИМОВА, 

«Садои мардум»