Модар, ту бартарӣ

Васфат ба сад забон бинамоянд шоирон,

Модар, ҳазор бор ба сифат ту беҳтарӣ.

Ту модари Заминиву дунёст тифли ту,

Модар ту не фариштаӣ, не ҳурӣ, не парӣ.

Модар фаришта нестӣ!

Модар, ту бартарӣ...

Модар фаришта нест, сутуни ду олам аст,

Момоҳаво зи муҳраи бобои Одам аст.

Ҳаргиз фаришта қудрати модар надоштаст,

Хешу табору хоҳару додар надоштаст.

Фарзанди нуҳмоҳаи дар бар надоштаст,

Овози нарми аллаи модар надоштаст.

Ҳарчанд шири модари мо рамзи покӣ аст,

Модар фаришта нест, як инсони хокӣ аст.

Модар зи оби тоқату хелидаи ғам аст,

Ӯ саршавии зиндагии зоти одам аст.

Аз оби чашми модари мо оби Зам-Зам аст,

Ӯ ҳамсар асту дилбар асту ҳусни олам аст.

Батнаш нахустин хонаи меҳр асту меҳан аст,

Модар фаришта нест, муқаддастарин зан аст.

Давлат НАЗАР